प्रधानमन्त्री बालेन्द्र शाह आफ्ना भारतीय समकक्षी नरेन्द्र मोदीको मैत्रीपूर्ण निमन्त्रणामा आइतबारभारतको दुईदिने राजकीय भ्रमणमा जाने भएका छन्। गत चैत मा प्रधानमन्त्रीको कार्यभार सम्हालेपछि उनको यो पहिलो विदेश भ्रमण हो।

परराष्ट्र मन्त्रालयले शुक्रबार पत्रकार सम्मेलन गरी भ्रमणको औपचारिक कार्यतालिका सार्वजनिक गरेको हो। कार्यतालिका अनुसार प्रधानमन्त्री शाहले सोमबारनयाँदिल्लीस्थित हैदरावाद हाउसमा भारतीय समकक्षी मोदीसँग उच्चस्तरीय प्रतिनिधिमण्डलस्तरीय द्विपक्षीय वार्ता गर्नेछन्। वार्तापछि विभिन्न द्विपक्षीय सम्झौता तथा समझदारीपत्र आदानप्रदान, ऊर्जा तथा पूर्वाधारसम्बन्धी परियोजनाको उद्घाटन एवं शिलान्यास र दुवै प्रधानमन्त्रीले संयुक्त पत्रकार सम्मेलन गर्ने कार्यक्रम तय भएको छ।

भ्रमणका क्रममा प्रधानमन्त्री शाहले भारतका राष्ट्रपति द्रौपदी मुर्मुसँग शिष्टाचार भेट गर्नेछन्। यस्तै, आइतबार नै उनीसँग भारतीय विदेशमन्त्री डा. एस. जयशंकरले शिष्टाचार भेट गर्नेछन् भने प्रधानमन्त्री शाहले राजघाटस्थित महात्मा गान्धीको समाधिस्थलमा श्रद्धासुमन अर्पण गर्ने कार्यक्रम छ।

प्रधानमन्त्री शाहको नेतृत्वमा अर्थमन्त्री डा. स्वर्णिम वाग्ले, परराष्ट्रमन्त्री शिशिर खनाल, प्रधानमन्त्रीका मुख्य सल्लाहकार कुमार बेन्जनकार तथा उच्च सरकारी अधिकारीहरूसहित ३४ सदस्यीय औपचारिक प्रतिनिधिमण्डल भारत जानेछ। यसका साथै निजी क्षेत्रका ५२ जना उद्योगी–व्यवसायी र सञ्चारकर्मीहरू पनि भ्रमणमा सहभागी हुनेछन्। भ्रमणका क्रममा द्विपक्षीय व्यापार, पारवहन, लगानी प्रवर्द्धन, ऊर्जा सहकार्य, भौतिक तथा डिजिटल कनेक्टिभिटी, कृषि, स्वास्थ्य, शिक्षा र विपद् व्यवस्थापनका विषयले प्राथमिकता पाउने मन्त्रालयले जनाएको छ। नेपालमा भारतीय लगानी आकर्षित गर्न ‘नेपाल–भारत बिजनेस फोरम’ समेत आयोजना गरिनेछ।

मन्त्रिपरिषद्को शुक्रबारको बैठकले प्रधानमन्त्रीको भारत भ्रमण स्वीकृत गरिसकेको छ। प्रधानमन्त्री शाह भ्रमण सम्पन्न गरी सोमबार साँझ स्वदेश फर्कने कार्यक्रम रहेको छ।