अमेरिकी विदेश मन्त्रालयका प्रवक्ता टमी पिगटले सामाजिक सञ्जाल ‘एक्स’ मार्फत उक्त पुष्टि गरे। हुथीहरूले साउदीका नागरिक विमानस्थल र महत्त्वपूर्ण पूर्वाधारहरूलाई लक्षित गर्दा सर्वसाधारणको ज्यान जानुका साथै यात्रामा गम्भीर अवरोध उत्पन्न भएको उनले बताएका छन्।
क्षेत्रीय सुरक्षा फेरबदल
बढ्दो सुरक्षा जोखिमका कारण साउदी अरबमा कर्मचारीको उपस्थिति घटाइरहँदा त्यस क्षेत्रका अन्य अमेरिकी कूटनीतिक नियोगहरूले पनि कर्मचारी व्यवस्थापनमा फेरबदल गरिरहेका छन्।
विदेश मन्त्रालयले बुधबार सुरक्षा सतर्कता जारी गर्दै अमेरिकी नागरिकहरूलाई सम्भावित आक्रमण र यात्रा अवरोधबारे सचेत गराएको छ। पछिल्ला साताहरूमा हुथीहरूले रियाधस्थित किङ खालिद अन्तर्राष्ट्रिय विमानस्थल, सैन्य प्रतिष्ठान, तेल पूर्वाधार र सामुद्रिक मार्गमा आक्रमण गरेपछि यो चेतावनी आएको हो।
नयाँ निर्देशनअनुसार साउदीमा कार्यरत अमेरिकी कर्मचारीहरूले हालैका मिसाइल तथा ड्रोन आक्रमणपछि त्यहाँका कुनै पनि विमानस्थल प्रयोग गर्न नियोग प्रमुखबाट विशेष अनुमति लिनुपर्नेछ।
नागरिक क्षति र अन्तर्राष्ट्रिय प्रतिक्रिया
यसैबिच, बुधबार साउदी अरबले कम्तीमा ७ वटा ड्रोन निष्क्रिय पारेको छ। पूर्वी प्रान्तस्थित शायबाह तेल क्षेत्रमा भएको आक्रमणमा दुई विदेशी कामदारको मृत्यु भएको छ भने अन्य दुई जना घाइते भए।
यमनको अन्तर्राष्ट्रिय मान्यता प्राप्त सरकार पक्षधर र साउदी समर्थित फौजले हुथीविरुद्ध कारबाही विस्तार गरेका छन्। अमेरिकाले गुप्तचरी र सूचना आदानप्रदानमार्फत सैन्य सहयोग बढाए पनि राष्ट्रपति डोनाल्ड ट्रम्पले प्रत्यक्ष सैन्य प्रहारको निर्णय गरेका छैनन्।
यता बेलायतले साउदीको रक्षाका लागि लडाकु विमानहरू तैनाथ गर्ने जनाएको छ भने इजिप्टले पनि आवश्यक सहयोग उपलब्ध गराउने प्रतिबद्धता व्यक्त गरेको छ।एजेन्सी