विराटनगर । राष्ट्रिय स्वतन्त्र पार्टी (रास्वपा)का बरिष्ठ नेता बालेन शाह आज मंगलबार मधेश प्रदेशको विभिन्न चुनावी कार्यक्रममा सहभागी हुने भएका छन् । उनको सचिवालयले सार्वजनिक गरेको कार्यतालिका अनुसार बालेनले भोलि एकैदिन सप्तरी, सिराहा, धनुषा र महोत्तरीका विभिन्न स्थानमा पुगेर स्थानीय जनतासँग साक्षात्कार गर्नेछन् । बालेन शाहको मधेश यात्रा भोलि बिहान साढे ८ बजे सप्तरीको सप्तकोशी नगरपालिकाबाट सुरु हुनेछ । उनको सचिवालयका अनुसार बिहान ८ः४५ मा कञ्चनरुप (घण्टी घर), ९ः१० मा हनुमाननगर र ९ः२० मा सप्तरी क्षेत्र नम्बर २ को सदरमुकाम राजविराज (घण्टी घर) पुग्ने कार्यक्रम छ । त्यसपछि उनी बिहान १०ः१० मा डाक्नेश्वरी नगरपालिका र १०ः२० मा बोधेबर्साइन नगरपालिकामा आयोजना हुने कार्यक्रममा सहभागी हुनेछन् । सप्तरीको कार्यक्रम सकेर बालेन सिराहा प्रवेश गर्नेछन् । सिराहामा उनको तालिका निकै व्यस्त देखिएको छ । जसमा भगवानपुर, नवराजपुर, बरियारपटी, औरही चोक, सुखीपुर जिरोमाईल घण्टी घर, गोलबजार, चोहर्वा, मिर्चैया, कल्याणपुर बजार, सिराहा बजारमा कार्यक्रम छ । सिराहाको भ्रमणपछि बालेनको टोली धनुषातर्फ लाग्नेछ । दिउँसो १ः३५ मा कमला पुल तरेर तिनकौरिया चोक पुग्ने उनी १ः५० मा यदुकुवा पुग्नेछन् । त्यसपछि दिउँसो २ः१० मा प्रसिद्ध धार्मिकस्थल धनुषाधाम र २ः४० मा नगराइनमा कार्यक्रम तय गरिएको छ । मंगलबार अपरान्ह ३ बजे महोत्तरीको सदरमुकाम जलेश्वर पुग्ने कार्यतालिका छ । त्यसपछि ३ः२० मा एकदरा र ३ः४० मा बलवा–सर्पल्लोमा स्थानीयसँग भेटघाट गरी उनी साँझ ४ः१० मा बर्दिबास पुग्नेछन् । बर्दिबासमा भोलिको दिनभरको भ्रमणको समापन हुने सचिवालयले जनाएको छ ।