सातै प्रदेशमा घोषणासभा आयोजना गर्ने समाजवादी मोर्चाको निर्णय
नेकपा एकीकृत समाजवादीका उपाध्यक्ष प्रमेश हमालका अनुसार मोर्चाले ८ गते मधेस प्रदेशको वीरगन्जमा, १२ गते लुम्बिनीको बुटवलमा, १३ गते सुदूपश्चिमको धनगढीमा, १४ गते कर्णालीको सुर्खेतमा, १५ गते गण्डकीको पोखरामा, २३ गते बागमतीको हेटौँडामा, २५ गते कोशीको विराटनगरमा सभाहरू गर्ने निर्णय गरेको छ । सोही घोषणासभाबाट प्रदेश मोर्चाको गठन गरिने पनि हमालले बताए ।
बैठकपछि सञ्चारकर्मीहरूसँग कुरा गर्दै नेकपाका महासचिव नेत्र विक्रम चन्द ‘विप्लव’ ले आजको बैठकपछि समाजवादी मोर्चाबारे सिर्जना भएका विभिन्न आशङ्काहरू आजदेखि अन्त्य भएको दाबी गरे । चन्दले भने, ‘एउटा तरङ्गमय माहौलमा मोर्चा घोषणा भएको थियो । तर, लामो समय बैठक बस्न नसक्दा बाहिर के हो–हो भन्ने भएको थियो । आज त्यो अन्त्य भएको छ ।’
मोर्चामा सत्तारूढ नेकपा (माओवादी केन्द्र), जनता समाजवादी पार्टी, नेपाल, नेकपा (एकीकृत समाजवादी) र नेत्रविक्रम चन्द नेतृत्वको नेकपा सहभागी छन् ।