सुदूरपश्चिम प्रदेश सभामा सभामुख चयन नहुदा संबैधानिक संकट आउन सक्ने
सुदूरपश्चिम प्रदेश सभामा सभामुख चयन नहुदा संबैधानिक संकट आउन सक्ने देखिन्छ । सुदूरपश्चिम प्रदेश सभा बैठकअघि सर्वदलीय बैठक बसेको छ । आज बिहान ८ बजेदेखि सर्वदलीय बैठक बसेको हो ।
सर्वदलीय बैठकका कारण बिहान ९ बजेका लागि बोलाइएको प्रदेश सभा बैठक आधा घण्टाका लागि सरेको छ । आजको प्रदेश सभा बैठक पनि सभामुख चयन गर्नका लागि बसिरहेको हो ।
गत शनिबार बसेको प्रदेश सभा बैठकले सभामुख चयन गर्न सकेको थिएन । नागरिक उन्मुक्ति पार्टी तटस्थ बस्दा त्यस दिन सभामुख चयन हुन सकेको थिएन ।
मुख्यमन्त्री राजेन्द्र सिंह रावलले दुई मन्त्री नियुक्त गर्दा सत्ता साझेदार दलहरूसँग छलफल नगर्दा नागरिक उन्मुक्ति पार्टी असन्तुष्ट छ । सोही कारण दुईपटक निर्वाचन हुँदा पनि सभामुख चयन हुन सकेको छैन ।
नागरिक उन्मुक्ति पार्टीबाट सुदूपश्चिम प्रदेश सभामा सातजना सांसद छन् । संसदको पहिलो बैठक बसेको १५ दिनभित्र सभामुख चयन गर्नुपर्ने व्यवस्था छ । त्यसैले आज सत्ता साझेदार दल सभामुख चयन गरिसक्नुपर्ने दबाबमा छन् ।
सुदूरपश्चिम प्रदेश सभामा कांग्रेसका १९, माओवादी केन्द्रका ११, नेकपा एमालेका १०, नागरिक उन्मुक्ति पार्टीका सात, एकीकृत समाजवादीका चार र राप्रपाका एकजना सांसद छन् । त्यस्तै, स्वतन्त्रबाट एकजना सांसद ।
सुदूरपश्चिममा सभामुख चयनका लागि कम्तिमा २७ मत आवश्यक पर्छ ।