यो सरकारको नारा समृद्ध नेपाल सुखी नेपाली हो भन्ने त तपाईँहरुलाई थाहै होला। यो नाराबाट छिमेकी देशका प्रधानमन्त्री मोदीसमेत प्रभावित छन्। उनले पटक पटक यो नारा आफ्नो भाषणमा उल्लेख गरे नेपाल आएका बेला अनि उतै दिल्लीमा हुँदा पनि। समृद्धि हासिल गर्न सरकारले  विभिन्न क्षेत्रका विषयगत विज्ञहरु राखेर राष्ट्रिय सल्लाहकार समिति बनाएको छ। त्यसमा चार वटा प्रविधिमा विज्ञ सदस्यहरु आवश्यक परेको सरकारले गोरखापत्रमा सूचना छापेर आवेदन दिन आऊ है भनेर आह्वान गरेको छ। विषयहरु छन्- जैविक प्रविधि, परमाणु विज्ञान प्रविधि, अन्तरिक्ष विज्ञान प्रविधि र सूक्ष्म विज्ञान प्रविधि। 

परमाणु विज्ञान प्रविधि र अन्तरिक्ष विज्ञान प्रविधिका विज्ञहरु चाहिँ नेपालमा सुन्दै अचम्म लाग्ने रहेछ। सूचना अनुसार यी सबै समितिमा नेपाल सरकारले विज्ञ सदस्य मनोनीत गरिसकेका रहेछन्। उनीहरुको पदावधि तीन वर्ष तोकिएकोमा समय सकिएको रहेछ।

को कसलाई नियुक्त गरिएको थियो कुन्नि। अहिले भने सरकारले खुला रुपमा निवेदन दिन आह्वानै गरेको छ। तर गएको फागुन महिनादेखि निवेदनका लागि आह्वान गरे पनि कसैको नपरेकोले त होला सरकार सूचना छापेको छाप्यै छ।

हेर्नुस् जेठ ११ गतेको सूचना

यो चाहिँ वैशाखमा प्रकाशित सूचना। त्यसमा ३० दिन भित्र अर्थात् जेठ ७ गतेसम्म आवेदन दिन भनिएको थियो। तर कसैको परेन।

त्यसभन्दा अगाडि गएको फागुनमा प्रकाशित सूचना। त्यसमा चैत १५ सम्म आवेदन दिन भनिएको थियो। तर कसैको परेन।

डिस्क्लेमर : यो सूचना चाहिँ यहाँ निःशुल्क छापिएको हो है, सरकारले जति विज्ञापन दिँदा पनि विज्ञहरुले आवेदन नदिएको भएर यसो ब्लग पढेर स्वदेश वा विदेशका कसैले आवेदन दिइहाल्लान् कि भनेर। सरकारको विज्ञ भएको भनेर बायोडेटामा लेख्न पाउनु पनि ठूलो कुरा हैन र।