संविधान सभाबाट नयाँ संविधान जारी भएपछि दोस्रोपटक शुक्रबार भएको स्थानीय तह निर्वाचन छिटफुट घटनाबाहेक शान्तिपूर्ण रुपमा सम्पन्न भएको छ।

बिहान ७ बजेदेखि साँझ ५ बजेसम्म आम जनताले गरेको मतदानमार्फत ७ सय ५३ स्थानीय तहका लागि प्रतिस्पर्धामा रहेका १ लाख ४५ हजार ११ उम्मेदवारको भाग्य र भविष्य मतपेटिकामा कैद भएको छ। ३५ हजार २ सय २१ प्रतिनिधिका लागि भएको निर्वाचनमा देशभर ६४ प्रतिशत मतदान भएको निर्वाचन आयोगको प्रारम्भिक अनुमान छ।

‘कतिपय ठाउँमा विभिन्न कारणले रोकिएको मतदान भइरहेको हुँदा प्राप्त तथ्यांकअनुसार साँझ ७ बजेसम्म देशभर ६४ प्रतिशत मतदान भएको छ,’ प्रमुख निर्वाचन आयुक्त दिनेश थपलियाले शुक्रबार साँझ आयोजित पत्रकार सम्मेलनमा भने, ‘काठमाडौं महानगरपालिकाको मतदानको स्थिति शान्तिपूर्ण र सहज हुँदाहुँदै पनि ५२ प्रतिशतको हाराहारीमा मात्रै मतदान भएको प्रारम्भिक अनुमान छ, यो सन्तोषजनक छैन।’ आयोगले ६५ देखि ७२ प्रतिशतसम्म मतदान हुने अपेक्षा गरेको थियो।

नयाँ नेतृत्वको प्रतिस्पर्धामा रहेका राजनीतिक दल र उम्मेदवारका लागि मात्र होइन, आमजनता उत्साहपूर्वक मतदानमा सहभागी भए पनि केही स्थानमा भने झडपका साथै असामान्य अवस्था सृजना भएको छ। प्रतिस्पर्धी राजनीतिक दलका उम्मेदवार र नेता तथा कार्यकर्ताले निर्वाचन परिणाम आफ्नो पक्षमा पार्न सक्रिय हुँदा ४४ ठाउँको मतदान स्थगित भएको छ। १४ जिल्लाका १७ स्थानीय तहअन्तर्गत २८ मतदान स्थलका ४४ वटा मतदान केन्द्रको मतदान स्थगित भएको आयोगले जनाएको हो।

एकै चरणमा निर्वाचन गर्दा सुरक्षा व्यवस्था मजबुत हुन नसकेको प्रारम्भिक आकलन गर्दै प्रमुख निर्वाचन आयुक्त थपलियाले भने, ‘राजनीतिक दल तथा उम्मेदवारबीच भएका अत्यन्त सानातिना विवाद बढ्दै जाँदा केही ठाउँमा प्रहरीद्वारा बल प्रयोग गरी मतदान स्थगन गर्नुपरेको छ भने केही स्थानीय तहमा वर्षाका कारण सबै मतदाता उपस्थित हुन नसक्दा सम्बन्धित मतदान अधिकृतले निर्वाचन स्थगन गर्नुभएको छ।’

मतदान स्थगित भएका मतदान केन्द्रमा त्यहाँको अवस्था बुझेर अर्को निर्वाचनका लागि मिति तोक्ने आयोगले जनाएको छ। ‘स्थगन गरेका मतदान केन्द्रमा हामीले सम्बन्धित निर्वाचन अधिकृतको कार्यालय र आयोगसँग समन्वय गरेर त्यहाँको वस्तुस्थितिसमेतको आधारमा छिट्टै पुनः मतदानको प्रारम्भ गर्नेगरी आवश्यक तयारी गरिरहेका छौं,’ प्रमुख आयुक्त थपलियाले भने।

कतिपय ठाउँमा विवादका कारण केही समय मतदान स्थगित भए पनि आपसी सहमतिमा पुनः सञ्चालन हुनुका साथै साँझसम्ममा मतदान सम्पन्न भएको छ। आफ्ना प्रतिनिधि आफैं छान्ने नागरिकको सार्वभौम अधिकार प्रयोग गर्दै आमनागरिकले आगामी ५ वर्षका लागि स्थानीय (गाउँगाउँमा सिंहदरबार) सरकार छनोट गरेका छन्। मतपेटिकामा कैद भएका तिनै जनप्रतिनिधिले आगामी ५ वर्ष ७ सय ५३ स्थानीय तहका ६७ सय ४३ वडा सरकार पनि चयन हुनेछन्। उनीहरूले नै सुशासन, आर्थिक विकासका साथै त्यहाँको दिशा र दशा मात्र होइन, संघीय लोकतान्त्रिक गणतन्त्रको प्रतिनिधित्व गर्नेछन्। तिनै जनप्रतिनिधिका लागि शुक्रबार मतदानसँगै अधिकतर स्थानीय तहको मतगणना रातिदेखि नै सुरु भएको छ। केही ठाउँको मतपेटिका संकलन गर्न समय लाग्ने भएकाले शनिबारदेखि मात्रै गणना सुरु हुनेछ।

दुर्गम जिल्लाका मतपेटिका ओसार्न समस्या भएकाले शनिबार हेलिकोप्टरको माध्यमबाट ओसार्ने गरी आवश्यक प्रबन्ध मिलाएको आयोगले जनाएको छ। नागरिक दैनिक बाट