नेपालका ओली र अमेरिकाका ट्रम्पको ‘कुर्सी मोह’ उस्तै !
काठमाडौं । केहीदिन अघि सम्म नेपालको प्रतिनिधि सभा विघटनको घटनाले मिडिया तातेको थियो । प्रधानमन्त्री केपी शर्मा ओलीले प्रतिनिधि सभा विघटन गरेपछिको उतावचढाव मिडियाको लागि ‘हट केक’ बनेका थिए । बुधबार साँझ देखि भने नेपाल लगाएत विश्वकै मिडियाको लागि नयाँ कन्टेन्ट आएको छ । अमेरिकामा राष्ट्रपति डोनाल्ड ट्रम्पका समर्थकले गरेको हिंस्रक प्रदर्शन र त्यसपछिका गतिविधि ।
अहिले नेपालमा र अमेरिकामा शक्ति हस्तान्तरणको उस्तै परिदृश्य देखिएको छ । नेपालमा प्रधानमन्त्री ओलीले कुर्सी छाड्न नसकेर संसद् नै विघटन गरिदिए । उता अमेरिकी राष्ट्रपति ट्रम्पले पनि निर्वाचनमा हार स्वीकार गर्न नसकेर सत्ता आफ्नो हातमा लिन अनेक उट्पट्याङ गर्दै छन् ।
दुई देशमा परिवेश फरक भएपनि सन्दर्भ समान देखिएका छन् । समानता हाे ‘कुर्सीको लडाई’ ।
अमेरिकाको राष्ट्रपति निर्वाचनमा डेमोक्रेटिक पार्टीका जो बाइडेनसँग पराजित भएपनि रिपब्लिकन पार्टीका वर्तमान राष्ट्रपति डोनाल्ड ट्रम्पले सत्ता (शक्ति) छाड्न तयार भएका छैनन् । उनी अझै पनि धाधँली भएको भन्दै अनेक कुतर्क गरिरहेका छन् ।
बाइडनसँग आफू पराजित भएको स्वीकार गर्न नसकि ट्रम्पले अदालतको ढोका ढक्ढकाएर । तर अदालतले समेत बाइडनकै पक्षमा बोल्दै निर्वाचनमा धाँधली भएको नपाइएको बतायो । त्यसपछि पनि उनी निर्वाचनमा धाँधली भएको भन्न छोडेनन् । ट्रम्पसँग मजबुत प्रमाण केही छैन तर पनि उनी बोल्न र सामाजिक संजालमा सक्रियता देखाउन पछि परेका छैनन् । उनले लगातार विवादास्पद ट्वीट गरेपछि ट्रवीटरले समेत उनलाई चेतावनी दिएको । अबको १२ घन्टाको लागि एकाउन्ट बन्द गरिदिएको छ भने फेसबुकले २४ घन्टा एकाउन्ट सस्पेन्ड गरेका छन् । यस्तै, इन्स्टाग्रामले कुनै पनि भिडियो र फोटो हाल्न नमिल्ने गरी ब्लक गरिदिएको छ । युट्युबले ट्रम्पका स–साना भिडियो हटाइदिएको छ ।
बुधबार संसदमा इलेक्ट्रोल मत सार्वजानिक गरी जो बाइडनको जित सुनिश्चित गराउन बहस चलिरहेका बेला ट्रम्पले आफ्नो अन्तिम प्रयास गरेका छन् । लगभग ‘कु’ शैली मा आफ्ना समर्थकलाई हिंसात्मक विद्रोह गर्न ट्रम्पले उक्साएका छन् । त्यो पनि देशकै राजधानी वासिंगटनमा रहेको क्यापिटल भवन अघि भएको प्रदर्शन यति हिंस्रक भयो कि चार जनाको ज्यान गयो । त्यतिमात्र होइन संसद भित्रै प्रदर्शनकारी पुगेपछि चलिरहेका इलेक्ट्रोल मतमाथीको बहस समेत रोकेर उपराष्ट्रपति उपराष्ट्रपति माइक पेन्स र सभामुख न्यान्सी पेलेसीलाइ सुरक्षित स्थानमा सारिएको थियो ।
अहिले त्यहाँ कफ्र्यु लगाइएको छ भने वाशिंटनमा १५ दिनको लागि आपतकाल घोषणा गरिएको छ । ट्रम्प सत्ताबाट बाहिरिन अब मात्र १३ दिन बाँकी छ । उनलाई शक्ति गुमाउनुको पीडा समग्र अमेरिकाले भोगिरहेका छन् जसरी नेपालका ओलीले गरेको असंबैधानिक निर्णयले सम्पूर्ण देशकै अवस्था अस्थिर बनेको छ भने हरेक नेपालीको टाउको नयाँ आर्थिक भारको बोझ थपिएको छ । संबिधानमाथी नै कू गरेका छन् ।
कतिपय बेला नेपलका ओलीको उट्पट्याङ र अमेरिकाको ट्रम्पको उट्पट्याङ उस्तै उस्तै देखिन्छ । हाल भने शक्ति संचयको लागि कुर्सी मोह दुबैमा उस्तै देखिएको छ भने कुर्सी जोगाउन गरिएका ताण्डव पनि उस्तै उस्तै देखिएका छन् ।
बहुमतको प्रधानमन्त्री हुँदाहुँदै पनि आफ्नै पार्टीको किचलो मिलाउन नसकेको ओली एक्लिएपछि प्रधानमन्त्री केपी ओलीले पद छाड्नुभन्दा प्रतिनिधिसभा नै विघटन गरिदिए । त्यतिमात्र होइन संसद् नै विघटन गरेपनि मन्त्रिपरिषद् भने विस्तार गरेर आफू निकटलाई मन्त्री पद दिइरहेका छन् । विभिन्न आयोगमा मनपरी नियुक्ति दिलाइरहेका छन् ।
म नै राज्य हुँ भन्ने भ्रमबाट ट्रम्प र ओली दुबै ग्रसित भएको पछिल्लो घटनाक्रमले देखाउँछ । अमेरिका जस्तो संसार कै ठुलो लोकतान्त्रिक मुलुकमा पनि शक्ति हस्तान्तरणमा यति सकस भइरहेको छ । उता लोकतान्त्रि अभ्यास गरिहेको नेपालमा पनि ओली प्रवृति उस्तै अलोकतान्त्रि बनिरहेको छ । आखिर कुर्सी मोह दुबैको उस्तै उस्तै छ ।