काठमाडौं– मुलपानी तेक्वान्दो डोजाङले प्रथम भर्चुअल राष्ट्रिय खुला तेक्वान्दो (पुम्से) प्रतियोगितामा दुई स्वर्ण जितेको छ।

काठमाडौं जिल्ला तेक्वान्दो संघले आयोजना गरेको प्रतियोगिताको पहिलो दिन (शनिबार) ६ स्पर्धाबाट मुलापानीले दुई स्वर्णसहित तीन रजत र दुई काश्य हात पारेको हो।

त्यस्तै कैलाली, रुपन्देही र चितवनका विद्यालय अन्तर्गतका खेलाडीले समान एक एक स्वर्ण जितेका छन्।

यू–१२ पुरुष एकलमा मुलपानीका भिजन तामाङ पहिलो भए। काभ्रेस्थलीका मिराज केसी दोश्रो तथा मुलपानीका रोनिश नगरकोटी र मुलपानीकै ईश्वर पराजुली तेश्रो भए।

सोही स्पर्धाको महिलामा विजेश्वरी विद्यालय कैलालीकी पूर्णिमा बस्नेतले स्वर्ण जितिन्। मुलपानीकी मेलिना राईले रजत तथा गोदावरी फिट्नेसकी सर्गम थापा र काभ्रेस्थलीकी सुस्मिता कार्कीले काश्य हात पारे।

यू–१५ पुरुष एकलमा कैलालीका अमनकुमार कठारिया शीर्ष स्थानमा रहे। मुलपानीका आयुश ढुंगेल दोस्रो हुँदा सैनिक महाविद्यालयका सुजन श्रेष्ठ र चन्द्रसूर्यका योग्य राईले तेस्रो स्थान प्राप्त गरे।

स्पर्धाको महिलामा चितवनकी आँचल बाजपाईं पहिलो भइन् भने मुलपानीकी प्रगति कुइँकेल दोश्रो भइन्। विजेश्वरीकी प्राप्ति पुन र काभ्रेस्थलीकी विनिशा खड्गीले तेश्रो स्थान हासिल गरे।

पुरुष ४० मुनी उमेर समूहको एकलमा रुपन्देहीका सुरज श्रेष्ठ पहिलो भए। त्यस्तै मैत्रीका रामचन्द्र व्यञ्जन्कार दोश्रो र बागलुङका नन्द विष्ट र योन्सुफका दुर्गामान तामाङ तेश्रो भए।

सोही उमेर समूहको महिलामा मुलपानीकी तृप्ति बुढाथोकीले डाइनामिककी जानकी तामाङलाई पछि पार्दै स्वर्ण जितिन्।

दुई दिने प्रतियोगितामा १९ टिमका १७० खेलाडीको सहभागिता छ। जसमध्ये पुरुषमा ६ र महिलामा पाँच गरी ११ स्पर्धा समावेश छन्। आज (आइतबार) बाँकी पाँच स्वर्णको टुंगो लाग्ने छ।

प्रतियोगितामा संघका अध्यक्ष अशोक खड्कासहित मीन न्यौपाने, हिराबहादुर थापा, नोर्बु लामा र विक्रम खड्गीले निर्णायकको भूमिका निर्वाह गरिरहेका छन्।