काठमाडौं । सरकारले बन्दाबन्दी (लकडाउन) आगामी २० गतेसम्मका लागि थप गर्ने निर्णय गरेको छ । प्रधानमन्त्री निवास बालुवाटारमा आईतबार बसेको मन्त्रिपरिषद्को बैठकले लकडाउन २० जेठसम्म लम्ब्याउने निर्णय गरेको सरकारका प्रवक्ता एवम् अर्थ र सञ्चार तथा सूचना प्रविधिमन्त्री डा.युवराज खतिवडाले बताए ।

मन्त्री खतिवडाले सरकारले कोरोना रोकथामका लागि थप १५ दिनसम्म बन्दाबन्दी (लकडाउन) जारी राखे पनि सँगसँगै आर्थिक गतिविधि अघि बढाउनुपर्ने बाध्यता रहेको बताए । आईतबारको बैठकमा बन्दाबन्दी (लकडाउन) को ‘मोडालिटी’ परिवर्तनको सम्बन्धमा पनि छलफल भएको उनले बताए । उनले सरकारले यसअघि गरेको निर्णयका आधारमा कृषि, उद्योग, निर्माणलगायतलाई निरन्तरता दिइने पनि बताए । सरकारका प्रवक्ता समेत रहेका अर्थमन्त्री डा खतिवडाले भने, “साना ठूला आयोजनाको निर्माण भइरहेकामा त्यसलाई निरन्तरता दिइनेछ ।”

बैठकमा अहिले क्वारेन्टिनमा बसिरहेकालाई कसरी उत्पादनसँग जोड्ने भन्ने विषयमा छलफल भएको मन्त्री खतिवडाले बताए । उनीहरुको सुरक्षा अपनाएर कसरी आफ्नै गाउँमा के गर्न सकिन्छ भन्ने विषयमा छलफल भएको छ । बैठकमा रोग प्रतिरोधात्मक क्षमता बढाउनका लागि जडीबुटीजन्य र औषधिजन्य वस्तुको उपयोग बढाउनुपर्ने विषयमा पनि छलफल भएको उनले जानकारी दिए ।

सीमावर्ती क्षेत्रमा बसिरहेका नागरिकका विषयमा पनि छलफल भएको थियो । क्वारेन्टाइनको क्षमता विस्तार गर्ने र एउटा प्रयोजनका लागि पास लिएका सवारीसाधन अर्को प्रयोजनका लागि प्रयोग हुन नदिने विषयमा पनि छलफल भएको थियो । उनले भने, “एम्बुलेन्सले बिरामी बाहेकका अरू बोकिरहेको र खाद्यान्न ढुवानी गर्ने सवारी पनि अरू काममा प्रयोग भएका विषयमा पनि छलफल भएको छ ।”

यसअघि आईतबार दिउँसो बसेको कोभिड–१९ सङ्क्रमण रोकथाम तथा नियन्त्रण उच्चस्तरीय समन्वय समितिको बैठकले बन्दाबन्दी (लकडाउन) को समय थप गर्न सरकारलाई सिफारिस गरेको थियो । उपप्रधान तथा रक्षामन्त्री ईश्वर पोखरेल संयोजक रहेको उक्त समितिको प्रधानमन्त्री तथा मन्त्रिपरिषद्को कार्यालय सिंहदरबारमा आईतबार बसेको बैठकले वर्तमान अवस्थामा बन्दाबन्दी नै प्रभावकारी माध्यम भएकाले यसलाई बढाउनुपर्ने निष्कर्षसहित सरकारलाई सिफारिस गरेको थियो ।