/नेकपाका सांसदले अब घरभाडा नलिने

नेकपाका सांसदले अब घरभाडा नलिने

रुपन्देही, निजी घर भएका नेकपाका सांसदहरुले घरभाडा नलिने घोषणा गरेका छन् । प्रदेशसभामा नेकपाबाट प्रतिनिधित्व गर्ने रूपन्देहीमा घर भएका सांसदले घरभाडा नलिने भएका छन ।
नेकपा संसदीय दलको बैठकले प्रदेशको राजधानी भएको जिल्लामा घर हुने सांसदलाई घरभाडा नलिन आग्रह गरेपछि उनीहरुले भाडा नलिने घोषणा गरेका हुन् ।नेकपा संसदीय दलका प्रमुख सचेतक भूमिश्वर ढकालले माघ महीनादेखि लागू हुने गरी घरभाडा नलिने निर्णय भएको बताए । यस अघि अनीहरुले घरभाडास्वरूप प्रतिमहीना रु १५ हजार बुझ्दै आएका थिए ।

भूमिश्वर ढकाल, भोजप्रसाद श्रेष्ठ, दधीराम न्यौपाने, डा कृष्ण न्यौपाने, कमला विकले हस्ताक्षर गरी प्रदेशसभा सचिवालयमा भाडा नलिने जानकारी गराए ।

जिल्लाबाट प्रतिनिधित्व गर्ने थानकुमारी थापा, विमला पन्थी, दीपा विक, सुनिता थटेरलगायत सांसद भाडामा बस्दै आएका छन् । यसअघि एक वर्षसम्म बुझ्दै आएको रकमलाई पनि सङ्कलन गरी कोषका रूपमा राखिने सांसद ढकालले बताए ।

भाडाका विषयमा काङ्ग्रेस सांसदले भने कुनै निर्णय गरेका छैनन् । सतासी सदस्यीय प्रदेशसभामा रूपन्देहीबाट एक मन्त्रीसहित १८ सांसदले प्रतिनिधित्व गर्छन् ।